Të paktën 70 vetë kanë mbetur të vdekur pas një sulmi të dyshuar kimik në Douma, qyteti i fundit i mbajtur nga rebelët në Ghoutën Lindore, në Siri.

Forcat e shpëtimit vullnetar, Helmetat e Bardha shpërndanë imazhe grafike duke treguar disa trupa në bodrume. Ata thonë se numri i viktimave kishte të ngjarë të rritej akoma më shumë, transmeton top channel.

Konfirmimi për viktimat e deritanishme vjen nga mjekët dhe vullnetarët në Siri, ndërsa qeveria vendase i ka quajtur akuzat për një sulm kimik, një trillim.

Departamenti amerikan i shtetit tha se raportet flasin për një numër potencialisht të lartë të viktimave, duke përfshirë edhe familjet në qendra strehimi.

DASH theksoi se Rusia me mbështetjen e palëkundur të saj për qeverinë e Sirisë, përfundimisht mban përgjegjësi për sulmet e supozuara.